Turtips Hjelle-Turtagrø-Skogadalsbøen-Hjelle

Visste du at den enklaste måten å starta den klassiske fjellturen frå Turtagrø via Skogadalsbøen og ned til Vetti Gard er med Tindevegsbussen? Les vidare, og legg ut på tur du også.

30. juni er startskotet for Tindevegsbussen som transporterer folk mellom Årdal og Turtagrø i sommarsesongen. Bussen går frå Hjelle i Øvre Årdal, og det blir difor mogleg å gå denne klassiske turen gjennom Jotunheimen på enkelt vis logistikkmessig sett. På Hjelle i Øvre Årdal er det mogleg å setja frå seg bilen (utan kostnad), for så å ta morgonbussen kl 08:55 til Turtagrø. Der startar turen, og du kan nytta den tida du treng utan stress, og med fleksible rammer for det talet overnattingar du ønskjer å ha på turen, på din retur tilbake til bilen som står parkert på Hjelle.

Turskildring her:

Dag 1:

Tidleg opp for å nå fram til Hjelle før bussen går til fjells kl 08:55 (sjekk alltid oppdatert rute for bekrefting av klokkeslettet HER). Set frå deg bilen på Hjelle og ta bussen til Turtagrø. Ankomst Turtagrø kl 10:10.

NB! Me tilrår at du bestiller bussbillett på førehand via vår nettbooking: Tindevegsbussen

Start turen frå Turtagrø mot Skogadalsbøen. Du kan velja mellom ulike rutealternativ:

Frå Turtagrø må du ta deg inn Helgedalen. Derifrå kan du velga om du vil gå via Fannaråken (som er 2 timar ekstra) for å få med deg ein 2000-meters topp på vegen. Det er mogleg å bestilla overnatting på Fannaråkshytta også - om ein td startar ut frå Turtagrø litt seint på dag. Eventuelt kan du gå gjennom Keisarpasset - ein nydeleg tur som tek deg frå høgfjellsterreng til skogsterreng før du kryssar brua over Utla på vegen til Skogadalsbøen. Overnatting på Skogadalsbøen eller i telt.

Tidsestimat: lang dagsmarsj frå 7 timar +

Dag 2:

Turen går gjennom nydeleg terreng frå Skogadalsbøen over Friken ned til Fleskedalen og vidare til Vettismorki. Her bør ein ta seg tid til å gå via det nye utsiktspunktet over Vettisfossen på vegen til Vetti. Denne dagen byr på ein lang dagsmarsj (6-8 timar) i delvis bratte nedoverbakkar, så ein kan vurdera ei natt på den nye DNT-hytta på Vettismorki for å bryta opp etappen litt. Elles tilrår me overnatting på idylliske Vetti Gard i Utladalen.

Ein kan velja å gå heile vegen til Hjelle der bilen står parkert - og slik sett gjera turen på 2 dagar, men me tilrår å legga inn ei ekstra natt anten på Vettismorki eller på Vetti Gard for opplevinga sin del.

Dag 3:

Nyt ein lang frukost og hald fram turen gjennom heimre Utladalen til Hjelle. Frå Vettismorki bør ein rekna 2-2,5 time til parkeringa på Hjelle. Frå Vetti Gard bør ein rekna ein god time. Hugs å stress ned og nyt den siste etappen gjennom denne unike dalen. Stopp gjerne innom Utladalen Naturhus og få med deg utstillinga der - som vil fortelja deg det du treng å vita om kulturlandskapet, Vest-Jotunheimen og Utladalen.